La Familia Adiktus 1: My Fiancé is a Vampire (Prologue, Part 4)
By: Zaira King
“Hay grabe, nakakapagod!” pasalampak na umupo si Mama Rene sa upuan sa kanyang condo unit. Si Romina naman ay napabuntong-hininga pagkatapos ay nahihiyang tumingin sa bading niyang kaibigan.
“Sorry Mama ha. Unang araw ko palang, nag resign na ako kaagad – “
“Asus, “ pakli ni Mama Rene na kasalukuyang inaamoy-amoy pa ang kanyang mga kamay na pagod na pagod sa paghawak at pagpisil ng *bleep* ng mga umihing lalaking walang kamay, “okay lang iyon Romina. Sino ba naman ang mag-aakala na bigla-bigla ay magkakaroon ng field trip ang mga lalaking walang kamay diba?”
Napakagat-labi si Romina dahil sa hiya sa kanyang kaibigan.
“Hayaan mo Mama Rene, hahanap ako ng trabaho kaagad-agad para naman makatulong ako sa iyo.”
“Naku naman ito si Romina. Ano ka ba? Okay lang iyon,” nakangiting sabi ni Mama Rene sa kaibigan. Tumayo ang bakla at nagtungo sa kusina. Maya-maya pa ay may dala na itong pagkain.
“Halika Romina kumain muna tayo,” anyaya niya sa dalaga. Natuwa naman si Romina dahil sa kahit papaano ay marami namang nakahandang pagkain – may tinapa, itlog na maalat, bagoong, tuyo, danggit at Lucky Me pancit canton na nakahain sa hapag. Ayaw ni Mama Rene ng maalat na pagkain. Allergic siya!
“Sige kain ka na Romina.”
Hindi makuhang umupo ni Romina sa hapag dahil sa kabila ng pag-iimbita sa kanya ni Mama Rene ay kitang-kita niyang itinatago nito ang ibang upuan ng lamesa sa loob ng kwarto nito.
“Ano ka ba Romina kumain ka na,” muling paanyaya ni Mama Rene habang nila-lock niya ang pinto kung saan niya itinago ang mga upuan. Nagdesisyon si Romina na kumuha nalang ng plato. Pero mukhang nabasa ni Mama Rene ang binabalak niya kaya naman mabilis nitong itinago ang mga plato at mga baso, pati mga kubyertos sa ilalim ng carpet ng kusina.
“Sige po Mama Rene, titikim-tikim nalang ako ng ulam mo. Hindi rin naman ako masyadong nagugutom eh,” pagsisinungaling ni Romina. Sa totoo lang ay isang araw na siyang hindi nakakakain. Ang baon kasi niyang nilagang itlog ay gumulong sa loob ng bus at natapakan ng konduktor. Komo hindi sila close ng konduktor na iyon ay naging piping saksi nalang siya ng pagkadurog ng magsisilbing pagtawid gutom sana niya hanggang sa marating niya ang Maynila.
“Ikaw ang bahala,” sabi ni Mama Rene habang masaya siyang kumakain. Nang akmang dadakmain na ni Romina ang tinapa ay biglang:
“Ay Romina, wag yung tinapa. Favorite ko kasi ‘yan eh. Alam mo hindi ako nakakatulog talaga kapag hindi ako nakakakain ng tinapa sa gabi.”
“Ah okay Mama.” Ibinaling ni Romina ang atensiyon niya sa itlog na maalat.
“Ay Romina huwag din ang itlog. Alam mo kasi hindi ako natutunawan kapag hindi ako nakakakain ng itlog na maalat sa gabi kaya naman ibalato mo nalang sa akin iyan.”
“O sige po Mama. Ito nalang danggit.”
Nakita ni Romina na umasim ang mukha ni Mama pagkatapos ay bumulong ito sa sarili na rinig pati ng mga nag-iinuman sa kanto.
“Ano ba naman ‘yan. Danggit na nga lang ang nagpapasaya sa buhay ko kukunin pa,” mahinang bulong ni Mama Rene na rinig hanggang baranggay outpost.
Hindi naman manhid si Romina para hindi makahalata. Sa ikinikilos ni Mama Rene ay malinaw pa sa sikat ng araw kung ano talaga ang saloobin nito. Obvious na obvious iyon para kay Romina.
“Mama naglilihi ka ba?” ang matalinong tanong ni Romina.
Kinabukasan…
“Romina this is it!” kinakabahang anunsiyo ni Mama Rene. Nakatayo sila sa tapat ng isang malaking mansiyon kung saan makikilala ni Romina ang kaibigan ni Mama Rene na nakapangasawa ng matandang mayaman. Nang malaman kasi ni Mama Rene na ang sadya ni Romina sa Maynila ay ang maghanap ng mayamang mapapangasawa na may mabangong apilyedo at ang makapanood ng taping ng Lotlot and Friends, gumana ang pagka Vicky Morales ala Wish Ko Lang ni Mama Rene. Hindi na matutupad ni Mama Rene ang wish ni Romina na mapanood ng live ang Lotlot and Friends dahil matagal nang walang kaibigan si Lotlot del Leon. Pero ang mas simpleng pangarap ni Romina na makapag-asawa ng mayaman ay kayang-kaya na ng powers ng bakla.
Sinipat ng maigi ni Mama Rene ang kanyang kaibigan. Napangiti siya. May ibubuga naman si Romina kung pagandahan at pagandahan ang usapan. Basta ba walang tanungan tungkol sa Multiplication Table ay nakakasigurado si Mama Rene na maiimpress kay Romina ang ka-blind date niyang baldadong Don.
Taas noong lumapit si Mama Rene sa guard na nakapwesto sa malawak na gate ng mansiyon.
“Guard nandiyan ba si Cris Aquino Yep at Bimbee Josh?”
“Opo maam,” magalang na sagot ng guwardiya. Napamulagat ng mata si Romina.
“Wow Mama! Kakilala mo si Cris at si Bimbee? Sila ba ang kakatagpuin natin?”
Nilingon ni Mama Rene si Romina. “Hindi Romina.”
“Guard pakitawag naman yung lady guard na si Bea Alonso.”
Umalis ang guard. Pagbalik niya ay may kasama na siyang matabang lady guard na may bigote at pawisan ang kili-kili.
“Hello Bea," bati ni Mama Rene. Ito nga pala si Romina siya yung sinasabi ko sa iyo.”
“Ah ikaw pala si Romina.” Nakangiting kinamayan ni Bea si Romina.
Nahihiyang napangiti si Romina. “Kayo po ba yung nakapangasawa ng mayaman? Bakit po nagta-trabaho kayo bilang lady guard?”
“Ah tama ka Romina nakapangasawa nga ako ng mayaman. Kaya lang namatay siya ng biglaan eh. Hindi pa niya nababago yung nakasulat sa last will and testament niya na sa kaibigan niyang bingi ipapamana ang lahat ng kayamanan niya. Kaya walang naiwan sa akin kundi yung pustiso at peluka niya.”
“Ay iyan po ba ang suot ninyo ngayon?” tanong ni Romina habang nakatingin sa umuugang pustiso ni Bea at habang nakikita niyang tumatabingi ang kulay magenta na wig nito.
“Ay hindi. Itong suot kung pustiso ay doon sa una kong asawa. Bale kasi pang-apat ko nang asawa si Rodolfo. Una kong asawa si Arnulfo, isa siyang kargador si pier. Pangalawa naman si Adolfo na isa namang snatcher sa Divisoria. Hay alam mo ba si Adolfo ang pinaka mahal ko sa mga naging asawa ko. Kaya lang kasi medyo tanga eh. Akalain mo ba namang dalawang kidney niya ang ibinenta para daw doble ang bayad. Ayun hindi na nakauwi ng bahay. Pangatlo ko namang naging asawa si Erwintulfo na kapatid ni Montulfo.”
“Ah okay po.” Pansin ni Romina na medyo friendly si Bea at talagang open book ang kanyang marriage life. Wala pang tatlong minuto silang nagkakakilala ay nagawa nang i-share ni Bea ang background ng mga asawa niya. Bago pa tuluyang i-share ni Bea ang sex life niya ay nagsalita na si Mama Rene.
“Uy Bea nandiyan ba si Don Henry Lopez y Zobel de Gates delas Trump?”
“Ay sayang nagkasalisi kayo. Kaalis lang ng ambulansiyang sumundo sa kanya eh. Inatake kasi si Don Henry matapos siyang aksidenteng maitulak ni Bimbee Josh ng limang beses sa hagdan.”
Nanlumo si Romina. Sa sobrang panlulumo niya ay hindi niya napigilan ang sarili na dali-daling pumasok sa loob ng mansiyon at isa-isahin ang bawat kwarto sa paghahanap kay Cris Aquino Yep upang masabuyan ito ng Red Wine na aksidenteng nakuha niya sa refrigerator ng mansyon habang sandali siyang nanonood ng Willing Willie sa living room. Sa wakas ay nagkaharap sila ni Cris Aquino Yep at Bimbee Josh.
“I know why you’re here,” nakaplaster sa mukha ni Cris Aquino Yep ang sikat na sikat niyang mongoloid smile. “You want to kill me noh?” nanunuksong sabi ni Cris. Binalingan niya ang kanyang anak na si Bimbee Josh. “Say hello Bimbee.”
Napatingin si Romina sa bata. Nakita niyang halos isang dangkal ang layo ng mga mata ni Bimbee sa isa’t-isa. Mukha siyang isang isda na kung tawagin ay matambaka.
“Hello,” nahihiyang bati ni Bimbee Josh habang umiinom ng gatas. “Mommy can I crack your head?” tanong ng bata sa ina.
“Later na Bimbee.” Sa naging sagot na iyon ni Cris ay biglang nagwala ang batang mukhang matambaka. Umikot ang mga mata nito pagkatapos ay hinila ang mga buhok…sa ilong.
“Oh Bimbee that’s bad. That’s bad Bimbee,” saway ni Cris habang kinukuha ang pepper spray mula sa kanyang bulsa. Nang hindi nagpasaway si Bimbee ay kaagad na hinilamusan ito ni Cris ng pepper spray na masaya namang dinilaan ni Bimbee.
“Favorite niya kasi ang pepper spray…bukod sa Fiesta Spaghetti,” paliwanag ni Cris. “Anyway, timely talaga ang pagpunta mo rito. Kasi yung friend ko na super yaman ay naghahanap ng maid para doon sa bahay ng daddy niya. Kung okay lang sa iyo ay ikaw na ang ire-recommend ko. Alam mo kasi yung daddy ng kaibigan ko ay naghahanap ng mapapangasawang katulong. So kung interested ka…”
“Opo interesado ako.”
Ito na ba ang simula ng pag-abot ni Romina sa kanyang mga pangarap? Isang oportunidad na ba para maiahon sa hirap ang kanyang pamilya at mapabango ang kanyang apilyedo ang kumakatok sa kanya? Hindi siya sigurado sa sagot pero nakahanda siyang sumugal.
“This is it!” sabi niya sa sarili habang tinutulungan niya si Cris na i-mouth to mouth si Bimbee na nalunod sa toilet bowl.
